မကွေး ဇူလိုင် ၃၀
မကွေးတိုင်းဒေသကြီး ကိုဗစ်-၁၉ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီမှ ကိုဗစ်-၁၉ ကာကွယ်ရေး အသုံးဆောင်ပစ္စည်းများနှင့် ထောက်ပံ့ငွေများပေးအပ်ပွဲ အခမ်းအနားကို ဇူလိုင်လ ၃၀ ရက်နေ့ နံနက် ၉ နာရီက တိုင်းဒေသကြီးစီမံအုပ်ချုပ်ရေးကောင်စီရုံး အစည်းအဝေးခန်းမ၌ ကျင်းပရာ မကွေးတိုင်းဒေသကြီး ကိုဗစ်-၁၉ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီ ဥက္ကဌ၊ တိုင်းဒေသ ကြီးစီမံအုပ်ချုပ်ရေးကောင်စီ ဥက္ကဌ ဦးတင့်လွင် တက်ရောက်၍ ကိုဗစ်-၁၉ ကာကွယ်ရေး အသုံးဆောင် ပစ္စည်းများနှင့် ထောက်ပံ့ငွေများ ပေးအပ်ခဲ့သည်။
အခမ်းအနားတွင် တိုင်းဒေသကြီးစီမံအုပ်ချုပ်ရေးကောင်စီ ဥက္ကဌ ဦးတင့်လွင်က လတ်တလော အသက်ရှူလမ်းကြောင်းဆိုင်ရာ Coronavirus Disease 2019(COVID-19) ကြိုတင် ကာကွယ်ရေး လုပ်ငန်းများကို အချိန်နှင့်တစ်ပြေးညီ ဆောင်ရွက်လျက်ရှိသည့် လူမှုကူညီရေး ပရဟိတအသင်းအဖွဲ့ များအား ဂုဏ်ပြုအမှာစကား ပြောကြားပြီး၊ တိုင်းဒေသကြီးစီမံအုပ်ချုပ်ရေးကောင်စီ ဥက္ကဌနှင့် အဖွဲ့ဝင် များက တက်ရောက်လာသည့် လူမှုကူညီရေး ပရဟိတအသင်းအဖွဲ့များအား ကိုဗစ်-၁၉ ကာကွယ်ရေး အသုံးဆောင်ပစ္စည်းများနှင့် တိုင်းဒေသကြီးအတွင်းရှိ မြို့နယ်အသီးသီးတွင် ကိုဗစ်-၁၉ ထိန်းချုပ်ရေး နှင့်အရေးပေါ်တုံ့ပြန်ရေးဆိုင်ရာ လုပ်ငန်းများအတွက် ခရိုင်(၅)ခရိုင်မှ ခရိုင်စီမံအုပ်ချုပ်ရေးအဖွဲ့ ဥက္ကဌ များထံ ထောက်ပံ့ငွေများကို ပေးအပ်ခဲ့ကြသည်။
အဆိုပါ အခမ်းအနားတွင် ကိုဗစ်-၁၉ ကာကွယ်ရေး အသုံးဆောင်ပစ္စည်းများဖြစ်သည့် Mask (၁၀၀၀၀၀)ခု ၊ PPE ဝတ်စုံ (၂၀၀၀) စုံ၊ Hand Gel (၅၀၀)ဗူး၊ ရော်ဘာလက်အိတ်(၁၂၅၀၀)စုံ၊ Face Shield (၁၂၅၀၀)ခုတို့အား လည်းကောင်း၊ ကိုဗစ်-၁၉ ထိန်းချုပ်ရေး နှင့်အရေးပေါ်တုံ့ပြန်ရေးဆိုင်ရာ လုပ်ငန်းများအတွက် ခရိုင်အလိုက် ထောက်ပံ့ငွေများအဖြစ် မကွေးခရိုင် (၄၇၅) သိန်း၊ မင်းဘူးခရိုင် (၃၅၀)သိန်း၊ သရက်ခရိုင်(၃၇၅)သိန်း၊ ပခုက္ကူခရိုင် (၃၇၅)သိန်းနှင့် ဂန့်ဂေါခရိုင် (၂၀၀)သိန်း၊ စုစုပေါင်း (၁၇၇၅)သိန်းတို့အား လည်းကောင်း အသီးသီးထောက်ပံ့ ပေးအပ်ခဲ့ကြောင်း သိရသည်။
