မကွေး ဇူလိုင် ၂၇
မကွေးခရိုင်အတွင်းရှိ မြို့နယ်များတွင် ကိုဗစ်-၁၉ရောဂါ ကာကွယ်ဆေး ထိုးရန်ကျန်ရှိသူများအား ကာကွယ်ဆေးများ ထိုးပေးနိုင်ရေးအတွက် ယနေ့နံနက်(၁၁) နာရီအချိန်က မကွေးမြို့နယ်၊ အထွေ ထွေအုပ်ချုပ်ရေးဦးစီးဌာန အစည်း အဝေးခန်းမ၌ မကွေးခရိုင်၊ ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီနှင့် ခရိုင်/မြို့နယ် အဆင့်ဌာနဆိုင်ရာများ၊ရပ်ကွက်အုပ်ချုပ်ရေးမှူးများ၊လူမှုရေးအသင်းအဖွဲ့များ လုပ်ငန်းညှိနှိုင်း အစည်းအဝေးကျင်းပခဲ့သည်။
အစည်းအဝေးတွင် မကွေးခရိုင်၊ ကိုဗစ်- ၁၉ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီ ဥက္ကဌ၊ခရိုင်အုပ်ချုပ်ရေးမှူး ဦးမောင်ထူးက ကိုဗစ်-၁၉ ရောဂါကာကွယ်ဆေးများ မကြာမီရောက်ရှိမှာဖြစ်ပြီး ဆေးရောက်ရှိပါက ဆေးထိုးရန်ကျန်ရှိနေတဲ့သူများကို အချိန်နှင့်တစ်ပြေးညီ ဆေးထိုးပေးနိုင်ရေး စာရင်းများကြိုတင်ပြုစုထားရန်နှင့် ပြည်သူများကျန်ရှိမှုမရှိစေရေး ဌာနဆိုင်ရာများနှင့်လူမှုရေးအဖွဲ့အစည်းများ၊စက်ရုံအလုပ်ရုံများမှတာဝန်ရှိသူအားလုံးပူးပေါင်းပါဝင်၍ စာရင်းကောက်ယူပေးရန်လိုအပ်ကြောင်းနှင့်ပြည်သူများ အဆင်ပြေချောမွေ့စွာ ဆေးထိုးနိုင်ရေး ဆောင်ရွက်မည့် အစီအစဉ်များကို အသေးစိတ်ဆွေးနွေးပြီး တက်ရောက်လာသူများက ဝိုင်းဝန်းအကြံပြုဆွေးနွေးခဲ့ကြသည်။
ထိုသို့ ဆေးထိုးရာတွင် "မကွေးခရိုင်အတွင်းရှိ မြို့နယ်အလိုက် အသက် (၆၅)နှင့်အထက်ရှိသူများကို ပထမဦးစားပေး ထိုးနှံပေးမှာဖြစ်ပြီး အစိုးရ/ ပုဂ္ဂလိကကျန်းမာရေးဝန်ထမ်းများ၊ Volunteer / ပရဟိတအသင်းအဖွဲ့များ၊ သံဃာတော်များ၊ သီလရှင်များ၊ နိုင်ငံ့ဝန်ထမ်းများ၊ ပုဂ္ဂလိကဘဏ်ဝန်ထမ်းများ၊ အကျဉ်းသားများ၊ ပုဂ္ဂလိကစက်ရုံ/အလုပ်ရုံဝန်ထမ်းများ၊ ဟိုတယ်/မိုတယ်/တည်းခိုခန်းများရှိ ဝန်ထမ်းများ၊ စားသောက်ဆိုင်ဝန်ထမ်းများ၊ ပုဂ္ဂလိက ပို့ဆောင်ရေး ဝန်ထမ်းများနှင့် Super Market နှင့် ဈေးများရှိ ဝန်ထမ်းများကို ဦးစားပေးအစီအစဉ်အတိုင်း ထိုးနှံပေးသွားမည်ဖြစ်ေကြာင်း၊ကိုဗစ်-၁၉ ကာကွယ်ဆေး (၂) ကြိမ် ထိုးနှံပြီးသူများကို ကာကွယ်ဆေးထိုးနှံပေးမည် မဟုတ်ဘဲ (၁)လအတွင်း ကိုဗစ်-၁၉ ကူးစက်ခံထားရသူများကို (၁)လကျော်မှသာ စာရင်းပေးသွင်းပြီး ကာကွယ် ဆေးထိုးနှံပေးသွားမှာ ဖြစ်ကြောင်း ခရိုင်ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီထံမှ သိရသည်။
မကွေးမြို့နယ်တွင် ကိုဗစ်-၁၉ရောဂါ ကာကွယ်ဆေးအလုံး (၁၀၀၀၀၀)ရောက်ရှိမည်ဖြစ်ရာ ကာကွယ်ဆေး ထိုးရာတွင် ပြည်သူများလွယ်လင့်တကူထိုးနိုင်ရေးအတွက် မကွေးမြို့နယ်တွင် မြို့နယ်ကျန်းမာရေးဦးစီးဌာန(၁)နေရာ၊မကွေးမြို့နယ် စုပေါင်းရုံးတွင် (၂)နေရာ၊တိုင်းဒေသကြီးအမျိုး သမီးရေးရာအဖွဲ့ရုံးတွင်(၁)နေရာနှင့် အ.ထ.က(၃) ကျောင်းတွင်(၁)နေရာ စုစုပေါင်း (၅) နေရာ စီစဉ်ဆောင်ရွက်ထားပြီး ခရိုင်အတွင်းရှိ ကျန်မြို့နယ်များတွင် အနည်းနေရာ(၃)နေရစီ စီစဉ်ဆောင်ရွက်ထားရှိပြီး ကိုဗစ်ကာကွယ်ဆေးထိုးရန် ကျန်ရှိနေသူများ အမြန်ထိုးနိုင်ရေး စီမံဆောင်ရွက်လျက်ရှိကာ ဆေးရောက်ရှိပါက ဆေးထိုးရမည့်နေ့ရက်အား ထပ်မံအသိပေးသွားမည်ဖြစ်ကြောင်း သိရသည်။
