မကွေး အောက်တိုဘာ ၁၉
နိုင်ငံတော်အစိုးရမှ သီတင်းကျွတ်အခါသမယ အထိမ်းအမှတ် အားဖြင့်လည်းကောင်း၊ အေးချမ်းသာယာပြီး ခေတ်မီဖွံ့ဖြိုးတိုးတက်သော စည်းကမ်းပြည့်ဝသည့် ဒီမိုကရေစီနိုင်ငံတော် သစ်တည်ဆောက်နေချိန်တွင် ပြစ်ဒဏ်ကျ အကျဉ်းသား၊ အကျဉ်းသူများမှလည်း တစ်ဖက် တစ်လမ်းမှ အကျိုးပြုနိုင်စေရန်နှင့် ပြည်သူလူထု နှလုံးစိတ်ဝမ်းအေးချမ်းစေရန် ရည်ရွယ်၍ တိုင်းဒေသကြီး နှင့်ပြည်နယ်အသီးသီးရှိ အကျဉ်းထောင်/အချုပ်ထောင်စခန်း အသီးသီးမှ အကျဉ်းကျခံနေရသူ များအား ပြစ်ဒဏ်လွတ်ငြိမ်း သက်သာခွင့်ပြုလျက်ရှိရာ မကွေးမြို့ ဗဟိုအကျဉ်းထောင်မှ ယနေ့ နံက်ပိုင်းမှစတင်၍ အကျဉ်းသား၊ အကျဉ်းသူ(၃၃၉)ဦးကို လွတ်ငြိမ်း သက်သာခွင့်ပြုခဲ့ကြောင်း သိရသည်။
အဆိုပါ အကျဉ်းသား/ အကျဉ်းသူများအား လွတ်ငြိမ်းသက်သာခွင့်ပြုခြင်း အစီအစဉ်ကို မကွေး ဗဟိုအကျဉ်း ထောင်တွင် ပြုလုပ်ရာ မကွေးတိုင်းဒေသကြီးအစိုးရအဖွဲ့ လုံခြုံရေး နှင့်နယ်စပ်ရေး ရာဝန်ကြီး ဗိုလ်မှူကြီး ကျော်ကျော်လင်း၊ လမ်းပန်းဆက်သွယ်ရေးဝန်ကြီး ရဲမှူးကြီး သူရသွင်ကိုကိုနှင့် တိုင်းဒေသကြီးအစိုးရအဖွဲ့ အတွင်းရေးမှူး ဦးဝင်းရှိန်တို့က လွတ်ငြိမ်းချမ်းသာခွင့်ရ အကျဉ်းသား/ အကျဉ်းသူများအား ဆုံးမဩဝါဒါစကားများ ပြောကြားခဲ့သည်။
ဆက်လက်၍ ပြစ်ဒဏ် လွတ်ငြိမ်း ချမ်းသာခွင့်ရ အကျဉ်းသား/အကျဉ်းသူများအား အကျဉ်း ထောင်ရှိ တာဝန်ရှိသူများမှ ကိုဗစ်-၁၉ ရောဂါကာကွယ် ဆေးထိုးပြီးစီးသည့် လက်မှတ်များနှင့် ခရီးစရိတ်များ ထောက်ပံ့ ပေးအပ်ကာ အကျဉ်းထောင်မှ လွတ်ပေးခဲ့သည်။
မကွေးတိုင်းဒေသကြီးအတွင်းရှိ သက်ဆိုင်ရာအကျဉ်းထောင်အသီးသီးမှ ဖွဲ့စည်းပုံ အခြေခံ ဥပဒေပုဒ်မ (၄၁၉)အရ ကြားနာစစ်ဆေးဆဲ ပြစ်မှုဆိုင်ရာ အမှုများကို ပိတ်သိမ်း၍ အကျဉ်းသား/ အကျဉ်းသူများအား ပြစ်ဒဏ်လွတ်ငြိမ်းခွင့် ပြုခြင်းဖြစ်ပြီး ပြစ်ဒဏ် လွတ်ငြိမ်းခွင့်ရသူအနေဖြင့် စုစုပေါင်း ( ၃၃၉)ဦးရှိးပြီး အမျိုးသား(၂၈၉)ဦးနှင့် အမျိုးသမီး(၅၀)ဦးရှိကြောင်း သိရသည်။
