မကွေး နိုဝင်ဘာ ၁၈
မကွေးတိုင်းဒေသကြီး မကွေးခရိုင် နတ်မောက်မြို့တွင် နိုဝင်ဘာလ ၁၃ ရက်နေ့ ည ၉ နာရီ ၄၀ မိနစ် အချိန်က နတ်မောက်မြို့မစျေး၌ မီးလောင်မှုဖြစ်ပွားခဲ့ပြီး၊ တိုင်းဒေသကြီးအစိုးရအဖွဲ့ အနေ ဖြင့် စျေးသစ် ပြန်လည်တည်ဆောက်နိုင်ရေး စျေးမီးလောင်ပြင် သန့်ရှင်းရေး ဆောင်ရွက်နိုင််ရေးနှင့် ယာယီစျေး အမြန်ဆောက်လုပ်နိုင်ရေး စီမံများဆောင်ရွက်လျက်ရှိရာ မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင့်လွင်သည် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်ကျော်လင်း၊ စီးပွားရေးရာ ဝန်ကြီး ဦးအောင်ချိန်၊လမ်းပန်းဆက်သွယ်ရေး၀န်ကြီး ရဲမှူးကြီး သူရသွင်ကိုကိုနှင့် အတူ တာဝန်ရှိသူများ လိုက်ပါကာ နိုဝင်ဘာ ၁၅ ရက်နေ့ ညနေ ၄ နာရီခွဲ အချိန်က မီးလောင်ကျွမ်းရာ နတ်မောက်မြို့မစျေးသို့ ရောက်ရှိပြီး တာဝန်ရှိသူများနှင့် တွေ့ဆုံ၍ လိုအပ်သည်များ မှာကြားဆောင်ရွက်ခဲ့သည်။
နတ်မောက်မြို့မစျေးသို့ ရောက်ရှိစဉ် တိုင်းဒေသကြီး ဝန်ကြီးချုပ်နှင့် အဖွဲ့အား တိုင်းဒေသကြီး စည်ပင်သာယာ ရေးအဖွဲ့ ညွှန်ကြားရေးမှူး ဦးထင်အောင်နှင့် တာဝန်ရှိသူတို့က မီးလောင်ကျွမ်းမှု အခြေအနေ၊ မီးလောင်ကျွမ်းရာ နတ်မောက်မြို့မစျေးအတွင်း သန့်ရှင်းရေး ဆောင်ရွက်ထားရှိမှုနှင့် နတ်မောက်မြို့ ဘုရားကြီးကွင်းတွင် ယာယီစျေး အမြန်ဆုံး ဆောက်လုပ်နေမှု အခြေအနေများအား လိုက်လံပြသ ရှင်းလင်းတင်ပြခဲ့ပြီး၊ တိုင်းဒေသကြီး ဝန်ကြီးချုပ်က စျေးသူ စျေးသားများ ယာယီစျေး အမြန်ဆုံးပြန်လည်ဖွင့်လှစ် ရောင်းချနိုင်ရေး ကြီးကြပ်ဆောင်ရွက်ရေးနှင့် စျေးပြန်လည် တည်ဆောက် နိုင်ရေး ကိစ္စရပ်များနှင့် စပ်လျဉ်း၍ လိုအပ်သည်များအား ဖြည့်ဆည်း မှာကြား ဆောင်ရွက်ခဲ့သည်။
အဆိုပါ နတ်မောက်မြို့မစျေး မီးလောင်ကျွမ်းမှုကြောင့် မြို့မစျေးအတွင်း(၆)ပေ (၇)ပေ အကျယ် ရှိ သွပ်မိုး ကွန်ကရစ်ခင်း ပတ္တမြားရုံ-၁(၄၀)ခန်း၊ပတ္တမြားရုံ-၂(၄၀)ခန်း၊ပတ္တမြားရုံ- ၃(၄၀)ခန်း၊ ပတ္တမြားရုံ-၄(၄၀)ခန်း၊ (၁၀)ပေ ပတ်လည်အကျယ်ရှိ သွပ်မိုး၊သွပ်ကာ ကွန်ကရစ်ခင်း ပုလဲရုံ-၃(၄ဝ) ခန်း၊ ပုလဲရုံ-၄(၃၀)ခန်း၊ (၉)ပေ၊(၁၀)ပေ အကျယ်ရှိ သွပ်မိုး သွပ်ကာ ကွန်ကရစ်ခင်း B ရုံအတွင်းခန်း (၁၂)ခန်း၊ စုစုပေါင်း စျေးဆိုင်ခန်း(၂၄၂)ခန်း မီးလောင်ကျွမ်းခဲ့ကြောင်း သိရသည်။
