မကွေး နိုဝင်ဘာ ၁၉
မကွေးတိုင်းဒေသကြီး အားကစားနှင့် ကာယပညာဦးစီးဌာနမှ ကြီးမှူးဖွင့်လှစ်သည့် အခြေခံ ရိုးရာခြင်းလုံး အားကစားသင်တန်းဆင်းပွဲ အခမ်းအနားကို နိုဝင်ဘာလ ၁၉ ရက်န့ နေ့လယ် ၃ နာရီက တိုင်းဒေသကြီး မိုးလုံလေလုံ အားကစားခန်းမ၌ ကျင်းပပြုလုပ်ရာ မကွေးတိုင်းဒေသကြီး အစိုးရအဖွဲ့ ဝန်ကြီးချုပ် ဦးတင့်လွင်၊ တိုင်းဒေသကြီးအစိုးရအဖွဲ့ဝင် ဝန်ကြီးများနှင့် ဌာနဆိုင်ရာ တာဝန်ရှိသူများ တက်ရောက် အားပေးကာ တိုင်းဒေသကြီး ဝန်ကြီးချုပ်က အမှာစကားပြောကြားသည်။
ဦးစွာ မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင့်လွင် က မြန်မာရိုးရာယဉ်ကျေးမှု အမွေအနှစ် မတိမ်ကော မပပျောက်စေရေးအတွက် ခြင်းလုံးအားကစားနည်းကို မြန်မာလူမျိုးတိုင်း ထိန်းသိမ်း စောင့်ရှောက်ရမည်ဖြစ်သောကြောင့် မိမိတို့အနေဖြင့် မြန်မာရိုးရာ အခြေခံရိုးရာ ခြင်းလုံး အားကစားနည်းသင်တန်းကို ကိုဗစ်-၁၉ ရောဂါဖြစ်ပွားနေသည့် ကာလအတွင်း အောင်မြင်စွာ ဖွင့်လှစ် နိုင်ခဲ့သည့်အတွက် ဝမ်းသာမိပါကြောင်း၊ သင်တန်းသား/သင်တန်းသူများအနေဖြင့် နည်းပြ ဆရာ/ ဆရာမများ သင်ကြားပြသပေးသော ခြင်းလုံးခတ်အားကစားနည်းများအား အမြဲမပြတ် လေ့ကျင့်ကာ နိုင်ငံ့ဂုဏ်ဆောင်သော အားကစားသမားကောင်းများ ဖြစ်လာသည်အထိ ကြိုးစား လေ့ကျင့်ကြစေလို ကြောင်း၊ တိုင်းဒေသကြီးအစိုးရအနေဖြင့် မကြာမီကာလအတွင်း မကွေးတိုင်းဒေသကြီး ဝန်ကြီးချုပ် ဖလား(၄)ပေါက်တန်းနှင့် အခြေခံထိချက်(၆)ချက် ခြင်းလုံးခတ် ပြိုင်ပွဲအား ကျင်းပသွားမည်ဖြစ်သဖြင့် ကြိုတင်ပြင်ဆင်လေ့ကျင့်ကာ အနိုင်ရရှိအောင် စွမ်းဆောင် ပေးကြစေ လိုကြောင်း ပြောကြားကာ သင်တန်းသား/သူများအား သင်တန်းဆင်း လက်မှတ်များ ပေးအပ်ခဲ့သည်။
ဆက်လက်ပြီး သင်တန်းသား/သူများမှ ရိုးရာ ခြင်းလုံး(၄)ပေါက်တန်း ဝိုင်းဖွဲ့အမှတ်ခတ် သရုပ်ပြသခြင်းနှင့် ဆီးဂိမ်းရွှေတံဆိပ်(၂)ဆုရှင် မတင်တင်လင်းတို့မှ ရိုးရာခြင်းလုံး သရုပ်ပြသခြင်း များ ပြသခဲ့ရာ တိုင်းဒေသကြီးဝန်ကြီးချုပ်မှ ဂုဏ်ပြုဆုငွေများ ပေးအပ်ချီးမြှင့်ခဲ့သည်။
အဆိုပါ အခြေခံရိုးရာခြင်းလုံး အားကစားနည်းသင်တန်းကို တိုင်းဒေသကြီးအတွင်းရှိ လူငယ်/ လူရွယ်များ မိမိတို့ ရိုးရာယဉ်ကျေးမှု အားကစားနည်းများအား ထိန်းသိမ်းကာကွယ် စောင့်ရှောက် တတ်စေရန်၊ တိုင်းဒေသကြီးအတွင်း နိုင်ငံ့ဂုဏ်ဆောင် အားကစားသမားကောင်းများ ပေါ်ထွန်းလာစေ ရန် ရည်ရွယ်၍ မကွေးတိုင်းဒေသကြီးအားကစားနှင့် ကာယပညာဦးစီးဌာနမှ ကြီးမှူး၍ အောက်တိုဘာ လ(၂၉)ရက်နေ့မှ နိုဝင်ဘာလ(၁၈)ရက်နေ့အထိ သင်တန်းဖွင့်လှစ်ခြင်း ဖြစ်ကြောင်း သိရသည် ။
