မကွေး     စက်တင်ဘာ     ၂၈

မကွေးတိုင်းဒေသကြီးဝန်ကြီးချုပ် ဦးတင့်လွင်သည် အစိုးရအဖွဲ့ဝင်ဝန်ကြီးများ နှင့်အတူ ယမန် နေ့ နံနက် ၁၀ နာရီခွဲက မင်းလှမြို့ ပြည်သူ့‌ဆေးရုံဝန်းအတွင်း၌ တည်ဆောက်ခဲ့သည့် ကိုယ်ထူ ကိုယ်ထတိုးချဲ့ကုသဆောင်(ကုတင်-၂၀)ဖွင့်ပွဲ အခမ်းအနားသို့ တက်ရောက်၍ ဖွင့်လှစ်ပေးခဲ့သည်။

အခမ်းအနားတွင် မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင့်လွင်နှင့် အဖွဲ့ဝင် ဝန်ကြီးများက  ကိုယ်ထူကိုယ်ထတိုးချဲ့ကုသဆောင် (ကုတင်-၂၀)အား ဖဲကြိုးဖြတ်ဖွင့်လှစ် ပေးခဲ့ပြီး တိုးချဲ့ကုသဆောင်အတွင်း လှည့်လည်ကြည့်ရှုကာ၊ တိုးချဲ့ကုသဆောင်ဖွင့်ပွဲတွင် ကပြဖျော်ဖြေပေးခဲ့ သည့် အကအဖွဲ့မျာအား ဂုဏ်ပြုဆုငွေများ ပေးအပ်ချီးမြှင့်ခဲ့သည်။

ဆက်လက်၍ ဖွင့်ပွဲအထိမ်းအမှတ် အခမ်းအနားကျင်းပရာ တိုင်းဒေသကြီး ဝန်ကြီးချုပ် ဦးတင့်လွင် က မင်းလှမြို့ ပြည်သူ့‌ဆေးရုံဝန်းအတွင်းမှ (၇၀’×၂၆’×၁၀’)ရှိ ကုတင်(၂၀)ဆံ့  ကိုယ်ထူ ကိုယ်ထတိုးချဲ့ ကုသဆောင်သစ်နှင့်လျှပ်စစ်သွယ်တန်းခြင်း၊ ကုတင်အလုံး(၂၀)၊ လူနာသုံးဘီရို၊ ဆေးပုလင်း ချိတ်တိုင် (Drip Stand) စသည့်မရှိမဖြစ် လိုအပ်သည့် ပစ္စည်းတန်ဖိုးများ အပါအဝင် အရပ်ရပ်ကုကုန်ကျစရိတ် ကျပ်သိန်း(၃၀၀)ခန့်ကို  ဆရာတော်သံဃာတော်များ၊ ဌာနဆိုင်ရာများနှင့် ပြည်သူတို့ရဲ့ ပူးပေါင်းပါဝင် လှူဒါန်းမှုဖြင့် တည်ဆောက် ဖွင့်လှစ်နိုင်ခဲ့ပြီဖြစ်၍ ဂုဏ်ယူဝမ်းမြောက် စကားပြောကြားကာ၊ ကိုယ်ထူ ကိုယ်ထတိုးချဲ့ကုသဆောင်(ကုတင်-၂၀) တည်ဆောက်ရေးကော်မတီဝင် ဦးစန်းအောင်က ကိုယ်ထူ ကိုယ်ထတိုးချဲ့ကုသဆောင်(ကတင်-၂၀) ဆောက်လုပ်ပြီးစီးမှု အခြေအနေများအား ရှင်းလင်းတင်ပြ ခဲ့ပြီး၊ ကိုယ်ထူကိုယ်ထတိုးချဲ့ကုသဆောင်(ကုတင်-၂၀)ဆောင်ရွက် ပေးမှုအပေါ် မြို့မိမြို့ဖ ဦးရဲလွင်က ကျေးဇူးတင်စကား ပြောကြားခဲ့သည်။

ဆက်လက်ပြီး တိုင်းဒေသကြီးဝန်ကြီးချုပ် ဦးတင့်လွင်က ကိုယ်ထူကိုယ်ထတိုးချဲ့ကုသဆောင် (ကုတင်-၂၀)အား တိုင်းဒေသကြီးကုသရေးနှင့်ပြည်သူ့ကျန်းမာရေးဦးစီးဌာနမှူး ဒေါက်တာ ဌေးလွင် ထံ လွှဲပြောင်းပေးအပ်ခဲ့ကြောင်းနှင့် ကိုယ်ထူကိုယ်ထတိုးချဲ့ကုသဆောင်(ကုတင်-၂၀) ဆောက်လုပ်ရန် မင်းလှမြို့နယ်စီမံအုပ်ချုပ်ရေးအဖွဲ့မှ မတည်လှူဒါန်းငွေနှင့်စေတနာရှင်အလှူရှင်ပြည်သူများ စုပေါင်း လှူဒါန်းမှုဖြင့် ဆောက်လုပ်ခဲ့ခြင်းဖြစ်ပြီး အဆောက်အဦးမှာ အလျား ၇၀ ပေ၊ အနံ ၂၆ ပေ၊ အမြင့် ၁၀ ပေ Steel Structure တစ်ထပ်ဖြစ်ကြောင်း သိရသည်။