မကွေးတိုင်းဒေသကြီး ရင်းနှီးမြှုပ်နှံမှုကော်မတီဥက္ကဋ္ဌ၊ မကွေးတိုင်းဒေသကြီးဝန်ကြီးချုပ် ဦးတင့်လွင်သည် တာဝန်ရှိသူများ လိုက်ပါကာ ယမန်နေ့ နံနက်ပိုင်းက မကွေးတိုင်းဒေသကြီး၊ မကွေး မြို့ရှိ ရာခိုင်နှုန်းပြည့် မြန်မာနိုင်ငံသားရင်းနှီးမြှုပ်နှံမှုလုပ်ငန်းဖြစ်သော Nine Color Co., Ltd. ၏ ရောင်စုံအမိုးသွပ်ပြား ထုတ်လုပ် ဖြန့်ဖြူးရောင်းချခြင်းလုပ်ငန်းသို့ သွားရောက် ကြည့်ရှုစစ်ဆေးသည်။

          ဦးစွာ တိုင်းဒေသကြီးဝန်ကြီးချုပ်နှင့် အဖွဲ့ Nine Color ရောင်စုံအမိုးသွပ်ပြား ထုတ်လုပ်ရေး လုပ်ငန်းသို့ ရောက်ရှိစဉ် ကုမ္ပဏီ၏ တာဝန်ခံ မန်နေဂျာ ဦးအောင်မြင့်မြတ်က လုပ်ငန်းဆောင်ရွက် နေမှုအခြေအနေများ၊ ရင်းနှီးမြှုပ်နှံမှုဆိုင်ရာ ကိစ္စရပ်များနှင့် စပ်လျဉ်း၍ ရှင်းလင်းတင်ပြခဲ့ပြီး၊ မကွေးတိုင်းဒေသကြီးရင်းနှီးမြှုပ်နှံမှုကော်မတီ ဥက္ကဋ္ဌ၊ တိုင်းဒေသကြီးဝန်ကြီးချုပ် ဦးတင့်လွင်က ကုန်ထုတ်လုပ်မှုမြှင့်တင်ရေး၊ ဈေးကွက်ချဲ့ထွင်နိုင်ရေးကိစ္စတို့နှင့် စပ်လျဉ်း၍ ပြောကြားကာ လိုအပ် သည်များ ဆွေးနွေးပေါင်းစပ်ညှိနှိုင်းဆောင်ရွက်ပေးသည်။

          ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် စက်ရုံအတွင်း ရောင်စုံအမိုး သွပ်ပြား ထုတ်လုပ် ဖြန့်ဖြူး ရောင်းချဆောင်ရွက်မှု အခြေအနေများအား လှည့်လည် ကြည့်ရှုအားပေး ခဲ့ကြောင်း သိရသည်။