မကွေး နိုဝင်ဘာ ၁၄
မကွေးတိုင်းဒေသကြီးအစိုးရအဖွဲ့မှ ကြီးမှူး၍ ဌာနဆိုင်ရာများ၊ စေတနာအလှူရှင်များ၏ (၃၇)ကြိမ်မြောက် စုပေါင်းမဟာ ဘုံကထိန်သင်္ကန်း ဆက်ကပ်လှူဒါန်းပွဲ အခမ်းအနားကို ယနေ့နံနက် ၉ နာရီက မကွေးတိုင်းဒေသကြီး ၊ ကျောင်းထိုင်ဘုန်းကြီးသင်တန်းကျောင်းတိုက်တွင် ကျင်းပပြုလုပ် ခဲ့ရာ မကွေးတိုင်း ဒေသကြီးအစိုးရအဖွဲ့ ဝန်ကြီးချုပ် ဦးတင့်လွင်နှင့်ဇနီး၊ တိုင်းဒေသကြီးအစိုးရအဖွဲ့ဝင် ဝန်ကြီးများနှင့် ၎င်းတို့၏ ဇနီးများ၊ ဌာနဆိုင်ရာအကြီးအကဲများနှင့် စေတနာအလှူရှင်များ တက်ရောက်သည်။
ရှေးဦးစွာ စုပေါင်းမဟာ ဘုံကထိန်သင်္ကန်း ဆက်ကပ်လှူဒါန်းပွဲအား နမောတဿ သုံးကြိမ် ရွတ်ဆို၍ အခမ်းအနားကို ဖွင့်လှစ်ခဲ့ပြီး မကွေးမြို့၊ သံဃာရာမကျောင်းတိုက် ပဓာနနာယက၊ နိုင်ငံတော်ဩဝါဒစရိယ ဘဒ္ဒန္တစိန္တာသာရ(အဘိဓဇမဟာ ရဌဂုရု)ထံမှ တက်ရောက်လာကြသည့် တိုင်းဒေသကြီးအစိုးရအဖွဲ့ ဝန်ကြီးချုပ် ဦးတင့်လွင်၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာတာဝန်ရှိ သူများ၊ စေတနာအလှူရှင်များနှင့် ဖိတ်ကြားထားသည့် ဧည့်ပရိတ်သတ်များက ငါးပါးသီလ ခံယူဆောက်တည်ကာ ဆရာတော်၊ သံဃာတော် များ ရွတ်ပွားတော်မူသည့် ပရိတ်တရားတော်များကို နာယူကြည်ညိုခဲ့ကြသည်။
ထို့နောက် မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင့်လွင်နှင့် တာဝန်ရှိသူများက သံဃာတော်အရှင်သူမြတ်များထံ ကထိန်လျာသင်္ကန်း၊ ကထိန်အခြံအရံပဒေသာပင်များနှင့် လှူဖွယ် ပစ္စည်းများကို ဆက်ကပ်လှူဒါန်းခဲ့ပြီး မကွေးမြို့၊ မဟာဓမ္မိကာရာမကျောင်းတိုက် ပဓာနနာယက၊ နိုင်ငံတော်သံဃမဟာနာယက အဖွဲ့ဝင် ဘဒ္ဒန္တဥတ္တရ (အဂ္ဂမဟာပဏ္ဍိတ) ထံမှ အနုမောဒနာတရား နာကြားပြီး လှူဒါန်းမှုအစုစုအတွက် ရေစက်သွန်းချ အမျှ ပေးဝေကာ ဗုဒ္ဓသာသနံ စိရံတိဌတု သုံးကြိမ်ရွတ်ဆို၍ အခမ်းအနားကို ရုပ်သိမ်းခဲ့သည်။
မကွေးတိုင်းဒေသကြီးအစိုးရအဖွဲ့မှ ကြီးမှူး၍ ဌာနဆိုင်ရာများ၊ စေတနာအလှူရှင်များ စုပေါင်းပြီး ကထိန်လျာသင်္ကန်း၊ ကထိန်အခြံအရံငွေပဒေသာပင်နှင့် လှူဖွယ်ပစ္စည်းများ ဆက်ကပ် လှူဒါန်းပွဲကို နှစ်စဉ် အစဉ်အလာမပျက် ဆင်နွှဲ ကျင်းပပြုလုပ်လျက်ရှိရာ ယခုနှစ်တွင် (၃၇)ကြိမ် မြောက်ရှိပြီဖြစ်ကာ စုပေါင်းမဟာဘုံကထိန်ပွဲတော်တွင် ပစ္စည်းတန်ဖိုးနှင့် အလှူငွေစုစုပေါင်း လှူဒါန်းငွေကျပ် ၇၇၆၇၈၄၀၀ ဆက်ကပ်လှူဒါန်းခဲ့ကြောင်း သိရသည်။
